::
2018.06.10 — Белсат, Сяржук Доўгушаў: хто прадставіў Беларусь на міжнародным фэсце ў Варшаве? (фота) / Газета "Новы Час" (novychas.by)
Загаловак
Белсат, Сяржук Доўгушаў: хто прадставіў Беларусь на міжнародным фэсце ў Варшаве? (фота)
Спасылка
Дата публікацыі
10.06.2018
Катэгорыя
рэпартажы
Поўны тэкст

У Варшаве 9 чэрвеня прайшоў International Festival of Warsaw. Нашу краіну прадстаўляў стэнд Беларускага Дома ў Варшаве і тэлеканала "Белсат", а на сцэне — музыкі Сяржук Доўгушаў, Васіль Семашкевіч, Мікалай Юніцкі, этнахарэограф Сяргей Выскварка з Любані.
Імпрэза мае банальную назву International Festival of Warsaw. Небанальна тое, што яна піярылася як сямейны пікнік і мела даволі вялікую гульнёвую зону для дзяцей. 

 International Festival of Warsaw канцэпцыяй нагадвае гарадзенскі Фестываль нацыянальных культур: этнічныя супольнасці, што жывуць у Польшчы, прадстаўляюць краіны свайго паходжання. Але заклік арганізатараў прыходзіць сем'ямі надаў варшаўскаму фестывалю "чалавечы твар": замест ВДНГ, якую можна было б чакаць, атрымаўся шчыльны кантакт выступоўцаў і гледачоў, актыўная падтрымка "сваіх" артыстаў дыяспарамі.


У International Festival of Warsaw удзельнічала каля 20 краін. Некаторыя (нават Сірыя) былі прадстаўленныя на самым высокім узроўні, стэндамі ад амбасадаў, некаторыя — грамадскімі арганізацыямі ці прыватнымі крамамі этнічнага накірунку.



Як распавёў сустаршыня Беларускага дома ў Варшаве Уладзімір Кобец, арганізатары фестывалю спярша звярнуліся да амбасады Беларусі ў Польшчы. Аказалася, патрабуецца столькі ўзгадненняў з Мінскам, што амбасада вымушанная была адмовіцца. Тады запрасілі Беларускі Дом у Варшаве. Удзел у фестывалі — справа нятанная, толькі арэнда месца з намётам каштуе тысячу злотых (каля 500 беларускіх рублёў).


Беларусы вырашылі збіраць сродкі краўдфандынгам і атрымалася амаль удвая больш, хапіла яшчэ на тое, каб запрасіць з дэманстрацыяй танцавальнай традыцыі свайго краю Васіля Семашкевіча, Мікалая Юніцкага і Сяргея Выскварку з Любані. Гледачы ахвотна далучаліся да танцаў, пагулялі ў вясельную гульню з хусткай.


Сяржук Доўгушаў ужо амаль паўгода жыве ў Варшаве. На фестывалі ён выступіў са спевамі пад колавую ліру. Гуляючы па фестывальных пляцоўках, беларускія музыкі пагралі разам з нігерыйскімі бубначамі і выцягнулі ўкраінку паскакаць гапак.

На беларускі стэнд наведвальнікаў запрашала прадстаўніца тэлеканала "Белсат", раздаючы фірмовыя торбачкі.

На стэндзе можна было даведацца пра дзейнасць канала і Беларускага Дома ў Варшаве, набыць кнігі ад незалежных беларускіх выдавецтваў, пачаставацца дранікамі, чорным хлебам са смальцам, салёнымі гуркамі, лідскім квасам і нават самагонкай.


Яшчэ гасцей на стэнд заваблівалі гукі дуды Аляксея Бурносенкі. Шырока вядомы ў вузкіх колах шоўмэн і прадусар пераехаў з Мінска ў Варшаву, але працягвае папулярызаваць беларускую культуру.

Яшчэ, хоць гэта і не было абвешчана, Беларусь прадстаўляла танцоўшчыца belly dance Ала Ключанкова. Дзяўчына родам з Гомеля, тры гады таму пераехала ў Варшаву і стварыла ўласную танцавальную студыю Aliah, якая выступіла на галоўнай фестывальнай сцэне і яшчэ дала майстар-клас.


Агулам атмасфера варшаўскага фестывалю, як і ў Гародні, святочная, людзей менш, затое шмат інтэрнацыянальных пар з дзецьмі. Адчуваецца, што жыхары Варшавы прызвычаенныя да розных культур і ўспрымаюць іх хутчэй як частку штодзённага жыцця, чым як экзотыку.

СМІ
Аўтар(ы)
Звязаныя персаналіі
Карта
Звязаныя лакацыі
Тэмы
Гэта кэшаваныя старонка. Апошняя сінхранізацыя з базай - 20.11.2021 03:51:41

Маеце пытанне ці заўвагу? Напішыце ў каментары. Звяртаем увагу, што каментары са спасылкамі і ад неаўтарызаваных аўтараў прэмадэруюцца.

Відэакурсы па этнаграфіі

Самы час вучыцца анлайн! Нашы відэакурсы размешчаны на адукацыйнай платформе Stepik.org і акрамя відэа утрымліваюць праверачныя тэсты для самакантролю.

Запісацца

Выкладчык: Уладзімір Лобач

Аб’ём: 70 урокаў, 14 гадзін відэа, 127 тэставых пытанняў

Курс прапануе паглыбленае азнаямленне з этнічнай гісторыяй і этнакультурнай спецыфікай Беларусі. Прадстаўлены лекцыі па раздзелах і тэмах вучэбнай праграмы "Этнаграфія Беларусі", якая выкладаецца аўтарам у Полацкім дзяржаўным універсітэце.

Запісацца

Выкладчык: Зміцер Скварчэўскі

Аб’ём: 13 урокаў, 2 гадзіны відэа, 100 тэставых пытанняў

Сярод разнастайных аспектаў беларускай міфалогіі, прадметам курсу абраны персанажны код: боствы, духі, дэманічныя істоты, героі і т.п.