Прэса → Матэрыял з прэсы:

2017.12.20 — Шчодры вечар на Спеўным сходзе (фота, відэа) / Газета "Новы Час" (novychas.by)

• Шчодры вечар на Спеўным сходзе (фота, відэа)
  http://novychas.by/kultura/szczodry-veczar-na-speunym-shodze-fota-videa

Да Шчодрага вечара яшчэ далекавата, але яго ўжо адзначаюць: на Спеўны сход 19 снежня завітаў палескі гурт “Вытокі”. Яны прывезлі з сабой шмат прыгожага самаробнага тэкстылю ды ператварылі прастору “Хто такі Джон Голт?” у палескую святліцу з фотазонамі.

Шчадраванне ў Дзятлавічах 13 студзеня 2014 года

Шчадруючы дома, гурт мае нашмат большую каманду, а ў Мінск прыехалі Алена і Мікола Яскевіч, Яўгенія і Галіна Храпановіч. Давялося прасіць дапамогу залы: пераапранулі дзвюх наведвальніц Спеўнага сходу ў цыганак, адну ў казу, а яшчэ адной даверылі насіць зорку. Цыганкі прасілі пазалаціць ручку, каза бадалася, памірала і аджывала — усё па плане. Хто не адарыў цыганак і не пачаставаў казу, можа падтрымаць Спеўны сход на Талацэ.

Прагучалі шчадроўкі гаспадару і гаспадыні, пажаданні дабрабыту на наступны год. Яшчэ гурт выконваў рэкруцкую і пазаабрадавыя песні. Даследчыца Ірына Мазюк распавяла гісторыю свайго знаёмства з гуртом. Прыехаўшы неяк у Лунінецкі раён, яна спадзявалася, што мясцовае начальства дапаможа транспартам, але нічога не выйшла. Затое Алена Яскевіч пасля раённай нарады работнікаў культуры, куды трапіла Ірына, сама запрасіла яе ў Дзятлавічы.

Вёска аказалася проста песеннай скарбніцай. Шчадроўкі з Дзятлавічаў і я вучыла на Ірыніных спеўных занятках. А потым “замацоўвала практычна”, далучыўшыся разам з іншымі вучаніцамі да абыходу вёскі ў вечар напярэдадні Старога новага года ў 2014-м. Тады ж нам пашанцавала паспяваць разам са старэйшымі жыхаркамі Дзятлавічаў.

Перад выступам “Вытокаў” наведвальнікі Спеўнага сходу развучылі з Сержуком Доўгушавым іншыя калядкі і паглядзелі фрагменты з фільма Вольгі Дземкі “Песні старой Еўропы”.

Сёння, 20 снежня, гурты “Вытокі” і VURAJ выступяць разам на канцэрце ў клубе “Бруге”. Палешукі будуць спяваць акапэльна, музыкі з VURAJ мінімальна падтрымаюць іх гучаннем інструментаў. 

Наступны Спеўны сход пройдзе ў студзені, на ім будзе зладжана жаніцьба Цярэшкі — гульнявое вяселле, што на Каляды ў Паўночнай Беларусі зводзіла пары моладзі.

• Газета "Новы Час" (novychas.by)

• Ляшкевіч (Ціханчук) Алена

• Мазюк І. В.
• Доўгушаў Сяргей
• Яскевіч Алена Дзянісаўна
• Яскевіч Мікалай Юр'евіч

• "Вытокі", фальклорны гурт (аг. Дзятлавічы, Лунінецкі раён)
• Спеўны сход / Установа “Культура роднага краю”

• аг. Дзятлавічы, Лунінецкі раён (Дятловичский c/c), Брэсцкая вобласць, Беларусь
• Лунінецкі раён, Брэсцкая вобласць, Беларусь
• Брэсцкая вобласць, Беларусь
• Беларусь

• каляды
• спевы