::
2017.06.02 — «Самаходы» сто гадоў таму засялялі Сібір, а сёння завіталі ў Беларусь / Газета "Новы Час" (novychas.by)
Загаловак
«Самаходы» сто гадоў таму засялялі Сібір, а сёння завіталі ў Беларусь
Спасылка
Дата публікацыі
02.06.2017
Катэгорыя
рэпартажы
Поўны тэкст

«Мы наўрад ці вернемся ў Беларусь. Ермакі — гэта ўжо наша радзіма. Мы сумуем па ёй нават зараз», — адказвалі госці на пытанне: ці магчымае вяртанне нашчадкаў перасяленцаў у сённяшнюю Беларусь.

Кадр з кінастужкі


У галерэі TUT.BY адбылася прэзентацыя дакументальнай стужкі “Самаходы”, прысвечанай беларусам, якія напрыканцы ХIX — пачатку XX стагоддзя ў пошуках лепшай долі перасяліліся ў Сібір. У якасці ганаровых гасцей імпрэзу адведалі нашчадкі беларусаў-перасяленцаў, жыхары вёскі Ермакі Цюменскай вобласці і прэзентавалі прысутным беларускія спевы.

Пра тое, як стваралася кінастужка “Самаходы” і гісторыю беларусаў-перасяленцаў, распавялі рэжысёрка Ірына Волах, сцэнарыст Вольга Лабачэўская, аператар Юры Плюшчаў.

 

 

Рэжысёрка Ірына Волах і нашчадак перасяленцаў з вёскі Рогань (Магілёўшчына) ў вёску Ермакі (Сібір) жыхарка Піцербурга Алена Новікава

У 1896-1910 гадах засвойваць сібірскія землі па ўласным жаданні, як казалі “самохадзь”, выехалі тысячы беларусаў, пераважна з Магілёўшчыны. Найчасцей выязджалі шматдзетныя сем’і, у якіх былі малыя надзелы зямлі, якія не дазвалялі пракарміцца. Перасяленцы прыязджалі ў прыгожы, але суровы край і, дзякуючы руплівай працы, станавіліся на ногі, наладжвалі гаспадарку, стваралі цэлыя вёскі. За чатыры пакаленні беларусы абруселі, але яны захавалі народныя звычаі, традыцыі, рамёствы, рэцэпт прыгатавання крафтавага роганьскага піва (дарэчы, страчаны ў самой Беларусі) і канешне непаўторныя па мілагучнасці беларускія спевы.

Сцэнарыстка Вольга Лабачэўская

Сібірскія беларусы стварылі на базе Ермакоўскага Дома культуры ансамбль “Расіяначка” — менавіта яго ўдзельнікі прысутнічалі ў Мінску на прэзентацыі кінастужкі —  і цяпер рэгулярна выступаюць з беларускімі песнямі ў вёсках і гарадах Расіі. Песняй “Што за рэчкай, за ракой…” яны парадавалі і наведнікаў галерэі TUT.BY.

 

 

Наталля Лось дэманструе абярэг з саломы

 

 


Выканаўцы старабеларускіх народных песень ад расчуленых гледачоў і арганізатараў атрымалі безліч цёплых слоў і падарункаў. Госці атрымалі торбы і дыскі з фільмам ад тэлекала “Белсат”, па асобніку газеты “Новы Час” з літаратурным дадаткам і саламяныя абярэгі ад майстрыхі Наталлі Лось.

 

 

Ганаровыя госці, нашчадкі беларусаў-перасяленцаў, выканаўцы ансамбля “Расіяначка” Ермакоўскага Дома культуры

 

 

 

 


“Мы наўрад ці вернемся ў Беларусь. Ермакі — гэта ўжо наша радзіма. Мы сумуем па ёй нават зараз”, — адказвалі ганаровыя госці на пытанне прысутных ці магчымае вяртанне нашчадкаў перасяленцаў у сённяшнюю Беларусь. Мо і праўда, іх продкі, крыху авантурысты і рамантыкі забралі часцінку Беларусі з сабой. Нездарма ж, у 1917 годзе жыхары вёскі Ермакі нават напісалі прашэнне губернатару дазволіць заснаваць ім “Ермакоўскую незалежную воласць”.

 

 

Ансамбль Ермакоўскага ДК выступае з беларускімі спевамі галоўным чынам у Цюменскай вобласці, але 1 чэрвеня гэты музычны калектыў выканаў дзьве песні на прэзентацыі дакументальнай стужкі "Самаходы".

СМІ
Аўтар(ы)
Звязаныя персаналіі
Звязаныя калектывы (гурты, установы)
Карта
Звязаныя лакацыі
Тэмы
Гэта кэшаваныя старонка. Апошняя сінхранізацыя з базай - 13.10.2019 09:23:53

Каментароў — 0

Запрашаем да абмеркавання! Звяртаем увагу, што каментары са спасылкамі і ад неаўтарызаваных аўтараў прэмадэруюцца.

Аўтарызавацца можна праз

Перайсці да абмеркавання гэтай старонкі.

* УВАГА! Партал ETHNO.by не прадугледжвае тэхнічнай магчымасці каментавання на старонках партала. Абмеркаванне матэрыялаў партала цалкам ажыццяўляецца сродкамі вонкавага сэрвіса Disqus.com, уладальнік каторага, паводле Пастановы Савета Міністраў РБ №850 ад 23.11.2018 нясе адказнасць за ідэнтыфікацыю карыстальнікаў і іх каментары.