::
2016.02.27 — “Старое сяло”: захаваць песенную разнастайнасць Палесся / Газета "Новы Час" (novychas.by)
Загаловак
“Старое сяло”: захаваць песенную разнастайнасць Палесся
Спасылка
Дата публікацыі
27.02.2016
Катэгорыя
рэпартажы
Поўны тэкст

У новай сталічнай краме “Кніжная Шафа”, якая месціцца на праспекце Дзяржынскага, адбылася творчая сустрэча з фальклорным дуэтам “Старое сяло” ў складзе Юліі Літвінавай і Васіля Грыня. Акрамя сустрэчы з прыхільнікамі нацыянальнага фальклору, “Старое сяло” прэзентавала слухачам свой дэбютны дыск лірычных спеваў “Дарожанька”, створаны паводле этнаграфічных экспедыцый па беларускаму Палессю.



Юлія Літвінава спявае і сольна

 

Як падкрэсліў перад пачаткам канцэрта Васіль Грынь, на стварэнне гэтых апрацовак іх падштурхнула архаічная песенная творчасць гэтага края, цудоўныя выканаўцы народных палескіх мелодый. У прыватнасці, фальклорны дуэт з вёскі Беразь Жыткавіцкага раёна Гомельскай вобласці Кацярыны Сцяпанаўцы Блоцкай і Амальяна Ціханавіча Страха (які, нажаль, ужо памёр) і шэраг іншых народных выканаўцаў, прозвішчы якіх пазначаны на дыску “Дарожанька”.

Вялікая скаладанасць запісу гэтых народных спеваў у тым, каб дакладна захаваць і перадаць на запісу фанетыныя, дыялектычныя асаблівасці паўднёва-беларускіх гаворак. Бо ў тых мясцінах бывае што суседнія вёскі маюць свае адметныя моўныя асабліваці альбо нават асобныя гаворкі. Дадатковую складанасць у расшыфроўцы песенных скарбаў Палесся стварае той факт, што многія з выканаўцаў, якія памятаюць даўнейшыя спевы — людзі сталага веку. А гэта значыць, што трэба асабліва ўважліва і старанна ставіцца да таго скарбу, які даверылі нам гэтыя людзі, да іх выканання.

Назву альбому дуэта “Старое сяло” “Дарожанька” даў радок з палескай паставой песні “Ты, дарожанька”, сэнс якой ў тым што ўсё жыццё чалаваек шукае сваю духоўную сцяжыну. Дарэчы гэты твор вядомы айчынным слухачам па апрацоўцы і шыкоўнаму відэа-кліпу этна-трыо “Троіца”. Запісаны ж на Палессі варыянт гэтага спева адрозніваецца больш глыбокім раскрыццём тэмы духоўнасці, мэты чалавеччага жыцця.

На канцэрце ў “Кніжнай Шафе” з нагоды прэзентацыі дуэта “Старое сяло” і выхада дыска “Дарожанька” прагучала шмат разнастайных спеваў, не толькі лірычных, але і сацыяльна-бытавых, бяседных, чумацкіх, салдацкіх, рэкруцкіх, песень на вячоркі… Усе яны былі выкананы дуэтам з удзелам Юліі Літвінавай і Васіля Грыня найбольш набліжана да аўтэнтычнай манеры выканання. У гэтым маглі пераканацца слухачы таму, што адначасова з расповедамі музыкантаў, гучалі песні альбома ў аўтэнтычным выкананні народнымі спевакамі: дуэтамі і сольнымі выканаўцамі. З арыгінальных песенных знаходак музыкантаў дуэта адзначу спеў “Гамэрыка” — горкі (і дагэтуль актуальны!) расповед палешчука, які паехаў на заробкі ў Злучаныя Штаты ды стаў ахвярай тамтэйшых прайдзісветаў.

На дэбютным альбоме “Дарожанька” дуэта “Старое сяло” гучаць не толькі вакальныя творы, але і інструментальныя мелодыі і маршы, якія выканаў на акардыёне Аляксей Крукоўскі. Дарэчы, дыск мае не толькі цікавае музычнае начынне, але шыкоўнае афармленне, якое таленавіта і стыльна зрабіла, пераклала на аглійскую мову Святлана Клёпікава. Да гонару музыкантаў зазначу, што дыск выдадзены прамысловым накладам, што робіць яго рэальным (не маргінальным, як камп’ютарныя «нарэзкі») унёскам у нацыянальную фанаграфію.

Трэба адзначыць, што падчас этнаграфічных экспедыцый музыканты збіраюць не толькі музычны фальклор Палесся, але і народныя прымаўкі, казкі, загадкі. Усё, што з’яўляеца інтэлектульным скарбам народа. Дык вось, адной з цікавых старонак гэтай музычнай сустрэчы стаў конкурс па адгадванню старажытных палескіх загадак, адказы на якіх патрабавалі не толькі здагадлівасці, але і веданне вясковага побыту. Тым не менш, гараджане паказалі, што фальклорная спадчына імі не забываецца. У падарунак за правільныя адказы музыканты прэзентавалі слухачам некалькі асобнікаў свайго дэбютнага альбома.

Хацелася б адзначыць, што ўладальнікі і працаўнікі новай крамы “Кніжная Шафа” распачалі сваю дзейнасць са стварэння на сваёй плошчы больш шырокай панарамы сучаснага беларускамоўнага кнігавыдання. На паліцах можна ўбачыць такія актуальныя выданні, як “Брест 1941”, але і беларускамоўнае перавыданне твора Нобелеўскай лаўрэаткі С.Алексіевіч “Цынкавыя хлопчыкі” і іншыя актуальныя кнігі. Акром гэтага, “Кніжная Шафа” правядзенннем творчай сустрэчы з дуэтам “Старое сяло” і прэзентацыі іх першага дэбютнага дыска “Дарожанька” зрабілі заяўку на тое, каб “Кніжная Шафа” з цягам часу пераўтварылася ў сапраўдны культурны і інфармацыйны цэнтр, дзе б рэгулярна ладзіліся сустрэчы з творчымі людзмі, пісьменнікамі, паэтамі, музычнымі гуртамі і асобнымі выканаўцамі. І першы вопыт такіх творчых сустрэч, у дадзеным выпадку з фолк-дуэтам “Старое сяло” ў складзе Юліі Літвінавай і Васіля Грыня, спадзяюся, дадасць энтузіязму працаўнікам крамы рабіць больш актыўныя захады для прапаганды нацыянальнай культуры.

СМІ
Аўтар(ы)
Звязаныя персаналіі
Звязаныя выданні
Звязаныя лакацыі
Тэмы
Гэта кэшаваныя старонка. Апошняя сінхранізацыя з базай - 16.10.2019 23:23:13

Каментароў — 0

Запрашаем да абмеркавання! Звяртаем увагу, што каментары са спасылкамі і ад неаўтарызаваных аўтараў прэмадэруюцца.

Аўтарызавацца можна праз

Перайсці да абмеркавання гэтай старонкі.

* УВАГА! Партал ETHNO.by не прадугледжвае тэхнічнай магчымасці каментавання на старонках партала. Абмеркаванне матэрыялаў партала цалкам ажыццяўляецца сродкамі вонкавага сэрвіса Disqus.com, уладальнік каторага, паводле Пастановы Савета Міністраў РБ №850 ад 23.11.2018 нясе адказнасць за ідэнтыфікацыю карыстальнікаў і іх каментары.