Прэса → Матэрыял з прэсы:

2011.01.15 — Жаніцьба на стары лад / Народнае слова, Віцебская абласная газэта

• Жаніцьба на стары лад " Газета Народнае слова- Новости Витебска и Витебской области
  http://nspaper.by/2011/01/15/zhanicba-na-stary-lad.html

Жаніцьба на стары лад

Адроджаны абрад жаніцьбы Цярэшкі з кожным годам збірае ўсё больш і больш прыхільнікаў. Калі сябры студэнцкага этнаграфічнага таварыства яшчэ ў сярэдзіне 90-х прыязджалі на Лепельшчыну, іх былі адзінкі. Яшчэ менш мясцовай моладзі разумела і падтрымлівала іх. У мінулыя ж выхадныя так многа народу хацела пабачыць абрад, паўдзельнічаць у ім, што раводзілі яго ў трох бліжэйшых вёсках – Аношкі, Велеўшчына і, нарэшце, уласна ў Цярэшках.

Сябры таварыства з Полацка, Віцебска, Мінска, іншых гарадоў прыехалі ў старадаўніх рэкаструяваных сялянскіх строях, музыкі прывезлі свае інструменты. Дзейства пачалося. Гучалі песні, у віхуры танцаў кружыліся пары, здавалася, нібыта час павярнуў назад. На вечар забыліся мадэрновыя тэхнарытмы, змяніўся светапогляд. – Во, блін, а я і не ведаў, што народнае свята можа быць вось такім! – у захапленні раскінуўшы рукі казаў сямнаццацігадовы знаёмец з Велеўшчыны. – Звычайна народнае свята праходзіць на адзін шаблон: збяруцца бабулькі, праспяваюць нешта – нецікава. А тут! Я няблага танцую ў клубе на дыскатэках, а сёння паспрабаваў прайсціся ў падыспані (правільна, здаецца, назваў). Ледзьве ногі дзяўчыне не адтаптаў, вучыцца мне яшчэ трэба.
На вечарынах многія ўпершыню пачулі дуду – старажытны музычны інструмент, які ў сярэднявеччы быў распаўсюджаны на Беларусі, а потым незаслужана забыты. Апошнім часам аматары даўніны па нямногіх захаваных узорах робяць новыя інструменты, нанава вучацца граць на іх.
Доўга яшчэ ўдзельнікі і госці дзейства дзяліліся ўражаннямі. Хаця гледачоў на вечарынах не было. Усім хапіла месца ў святочным карагодзе!

Васіль Матырка, фота аўтара.

• Народнае слова, Віцебская абласная газэта

• Матырка Васіль

• РМГА Студэнцкае Этнаграфічнае Таварыства (СЭТ)

• Віцебская вобласць, Беларусь
• Лепельскі раён, Віцебская вобласць, Беларусь

• каляды