Прэса → Матэрыял з прэсы:

2017.04.18 — Валачобнікі вяртаюцца. Як на Наваградчыне аднаўляюць забыты абрад / Belsat / Белсат — тэлеканал

• Валачобнікі вяртаюцца. Як на Наваградчыне аднаўляюць забыты абрад
  https://naviny.belsat.eu/news/valachobniki-vyartayutstsa-yak-na-navagradchyne-adnaulyayuts-zabyty-abrad/

Калісьці ў пасёлку Ацмінава Наваградскага раёну Вялікодныя святы ў мясцовых жыхароў асацыявалася перш за ўсё з радасным прыходам да гаспадароў гуртоў валачобнікаў з адмысловымі велікоднымі спевамі і віншаваннямі. Цяпер традыцыю спрабуюць адрадзіць.

Валачобнае свята да позняга сярэднявечча было наўпрост звязанае з пачаткам земляробчых працаў. У тыя часы мужчыны збіраліся разам, каб прайсціся па вёсцы ды заспяваць для гаспадароў адмысловыя валачобныя песні. Лічылася, што абрад гэты спрыяе ўрадлівасці і абараняе ад розных няшчасцяў. Гаспадары, пачуўшы валачобнікаў, адорвалі іх каўбасамі, яйкамі і хлебам.

         
Паступова, з узмацненнем уплыву хрысціянскай царквы, валачобны абрад стаўся прымеркаваны да Вялікадня. Таксама згубіўся і магічны сэнс – цяпер гэта забаўляльны элемент свята.

У камуністычныя гады валачобніцкая традыцыя ў Ацмінава была паступова страчаная, але не цалкам: мясцовы энтузіяст Андрэй Кіслы паспеў назбіраць тэксты вясковых велікодных песняў. З аднадумцамі яму два гады таму ўдалося адрадзіць валачобніцкі абрад. У адноўленым валачобным гурце ёсць свой гарманіст і механоша, які збірае падзякі гаспадароў у вялізны ўпрыгожаны кошык.

Адметна, што калі валачобнікі два гады таму ізноў пачалі абыходзіць вёску, апынулася, што шматлікія яе жыхары яшчэ не забыліся на традыцыю! Некаторыя з мясцовых часам нават запрашалі за стол і кілішак.

Падабаецца абрад і дзеткам, якія часам просяць бацькоў спецыяльна прыехаць на Вялікдзень да бабулі ў Ацмінава.

Нягледзячы на тое, што сучасныя ацмінавскія валачобнікі пакуль што спяваюць толькі адну валачобную песню, а не некалькі, як іх продкі, усё ж Ацмінава пацвярджае ідэю аб тым, што мясцовая ініцыятыва можа нават без падтрымання звонку адраджаць нашую традыцыйную культуру.

Вячаслаў Радзіміч, belsat.eu

• Belsat / Белсат — тэлеканал

• Сталяроў А. (Вячаслаў Радзіміч)

• в. Ацмінава, Навагрудскі раён (Отминовский c/c), Гродзенская вобласць, Беларусь
• Навагрудскі раён, Гродзенская вобласць, Беларусь
• Гродзенская вобласць, Беларусь
• Беларусь

• вялікдзень
• валачобнікі