::
2019.10.24 — «Эратычныя танцы» вяртаюцца: Дударскі клуб распачаў новы сезон у Мінску (фота, відэа) / Газета "Новы Час" (novychas.by)
Загаловак
«Эратычныя танцы» вяртаюцца: Дударскі клуб распачаў новы сезон у Мінску (фота, відэа)
Спасылка
Дата публікацыі
24.10.2019
Катэгорыя
рэпартажы
Поўны тэкст

Дударскі клуб (суполка аматараў беларускай дуды) 22 кастрычніка распачаў новы сезон танцавальных вечарын. Глядзіце, як весела прайшла першая сустрэча!
Прапануючы ў рэдакцыі зрабіць артыкул пра адкрыццё новага (між іншым, дзясятага і юбілейнага) сезону сустрэч Дударскага клуба, атрымала згоду ў форме: “А, эратычныя танцы? Ну, давай!” Нагадаю, што мінулы артыкул пра Дудклуб зваўся “Нейкія танцы ў вас… занадта эратычныя”. Закальцоўка часу. Такое ж адчуванне было і на вечарыне: быццам бы перапынку на лета не было, тыя ж людзі, той жа Beer&Wine, той жа дыван на падлозе і тая ж сяброўская атмасфера.
Відэа Насты Духоўнікавай

На вечарынах граюць сярэднявечныя і беларускія традыцыйныя танцы, а таксама танцы розных народаў Еўропы. Прыкладна палова танцаў – парныя, вялікая частка ў коле ці ланцужком. На сустрэчы можна запрашаць танчыць каго заўгодна, таму прыходзіць без партнёра ці партнёркі не страшна. У кола можна далучацца смела, адно пажадана, калі колькасць танцораў дазваляе, каб чаргаваліся хлопцы і дзяўчаты. Прынамсі, калі хлопцаў менш, варта ім станавіцца між дзяўчатамі, а не побач адно з адным. Ад запрашэння ў парны танец не прынята адмаўляцца, але гэта не жорсткае правіла, гвалтоўна ніхто нікога танчыць не пацягне.


Антось Бельскі

Арганізатар сустрэч Дудклуба Антось Бельскі распавядае: “У гэтым сэзоне заплянаваныя тэматычныя вечарыны, у тым ліку прысьвечаныя народным каляндарным абрадам. Будуць цікавыя музычныя госьці, выступы дудароў па прынцыпе вольнага мікрафону, танцы, спевы ды прыемныя сюрпрызы. Прыходзьце!”Вечарыны Дударскага клуба будуць праходзіць праз аўторак у мінскім бары Beer&Wine (вул. Кульман, 9). Наступная сустрэча – 5 лістапада.


Фота Уладзіміра Гудвіна

СМІ
Аўтар(ы)
Звязаныя калектывы (гурты, установы)
Карта
Звязаныя лакацыі
Тэмы
Гэта кэшаваныя старонка. Апошняя сінхранізацыя з базай - 11.01.2020 17:31:30

Каментароў — 0

Запрашаем да абмеркавання! Звяртаем увагу, што каментары са спасылкамі і ад неаўтарызаваных аўтараў прэмадэруюцца.